ໃນວັນທີ 13 ມິຖຸນາ 2024 ທີ່ ໂຮງແຮມ ເດີແກຼນລີເວີຊາຍ ເມືອງ ວັງວຽງ ແຂວງວຽງຈັນ, ກົມສົ່ງເສີມການຄ້າ ແລະ ຫັດຖະກໍາ ກະຊວງອຸດສາຫະກໍາ ແລະ ການຄ້າໄດ້ຈັດກອງປະຊຸມທາບທາມ ແລະ ປະກອບຄໍາເຫັນຕໍ່ ຮ່າງດໍາລັດ ວ່າດ້ວຍສິນຄ້າໜຶ່ງເມືອງ ໜຶ່ງຜະລິດຕະພັນ ຄັ້ງທຳອິດຢູ່ຂັ້ນທ້ອງຖິ່ນ; ໃຫ້ກຽດເປັນປະທານໂດຍ ທ່ານ ປອ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ນອກນັ້ນຍັງມີ ຄະນະກົມ, ຄະນະພະແນກຈາກ ກົມກົດໝາຍ ກະຊວງຍຸຕິທຳ; ກົມນິຕິກຳ ຫ້ອງວ່າການ ສໍານັກງານນາຍົກລັດຖະມົນຕີ; ກົມອາຫານ ແລະຢາ ກະຊວງສາທາລະນະສຸກ; ຜູ້ຕາງໜ້າຈາກ ພະແນກ ອຸດສາຫະກໍາ ແລະ ການຄ້າ 09 ແຂວງພາກເໜືອ ແລະ ຄະນະຮັບຜິດຊອບຈາກ ກົມສົ່ງເສີມການຄ້າ ແລະ ຫັດຖະກຳຈໍານວນໜຶ່ງ ເຂົ້າຮ່ວມທັງໝົດ 42 ທ່ານ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອທາບທາມ ແລະ ປະກອບຄຳເຫັນຕໍ່ ຮ່າງເນື້ອໃນ ດຳລັດ ສິນຄ້າ ໜຶ່ງເມືອງ ໜຶ່ງຜະລິດຕະພັນ ສະບັບນີ້ ເຮັດໃຫ້ມີເນື້ອໃນຄົບຖ້ວນສົມບູນ ສອດຄ່ອງຕາມສະພາບຕົວຈິງຂອງແຕ່ລະທ້ອງຖິ່ນ; ຊຶ່ງພາຍຫຼັງທີ່ໄດ້ຮັບການອະນຸມັດຈາກຄະນະນໍາກະຊວງ ອຄ ໃຫ້ຍົກຂໍໍ້ຕົກລົງ 1225/ອຄ ຂຶ້ນເປັນ ດໍາລັດ ຕາມຂໍໍ້ຕົກລົງ ສະບັບເລກທີ 2041/ອຄ, ລົງວັນທີ 09 ພະຈິກ 2023. ກົມສົ່ງເສີມການຄ້າແລະ ຫັດຖະກໍາ ໄດ້ດໍາເນີນການກະກຽມ, ສ້າງໂຄງຮ່າງ ດໍາລັດ, ຮ່າງເນື້ອໃນດໍາລັດ ແລະ ຮ່າງແຜນດໍາເນີນການສ້າງດໍາລັດ ຕາມຂັັ້ນຕອນ.
ໄລຍະຜ່ານມາ ທາງກົມໄດ້ຈັດກອງປະຊຸມລະດົມຄໍາຄິດເຫັນທາງດ້ານວິຊາການພາຍໃນກົມ; ປະຊຸມກັບພະແນກນິຕິກໍາ ຫ້ອງການກະຊວງ ອຄ; ປະຊຸມກັບກົມກົດໝາຍ ກະຊວງຍຸຕິທຳ ແລະ ຈັດກອງປະຊຸມຄະນະຮັບຜິດຊອບຄົ້ນຄວ້າສ້າງດໍາລັດ ສິນຄ້າໜຶ່ງເມືອງ ໜຶ່ງຜະລິດຕະພັນ ຮ່ວມກັບຂະແໜງການທີ່ກ່ຽວຂ້ອງ ຢູ່ຂັ້ນສູນກາງ ລວມທັງໝົດ 04 ຄັັ້ງ.
ທ່ານ ປະທານໄດ້ກ່າວຕໍ່ກອງປະຊຸມໂດຍເນັ້ນເຖິງຄວາມໝາຍສໍາຄັນ ຂອງການຍົກສູງ ການສ້າງດຳລັດ ສິນຄ້າ ໜຶ່ງເມືອງ ໜຶ່ງຜະລິດຕະພັນ ແມ່ນເປັນວຽກງານໜຶ່ງ ທີ່ມີຄວາມສຳຄັນ, ຊຶ່ງເປັນການຜັນຂະຫຍາຍ ແລະ ປະຕິບັດແນວທາງນະໂຍບາຍຂອງ ພັກ-ລັດ ຕິດພັນກັບການສ້າງວຽກເຮັດງານທຳ, ສ້າງອາຊີບ ແລະ ສ້າງລາຍຮັບໃຫ້ແກ່ຊຸມຊົນ ກໍ່ຄືການແກ້ໄຂຄວາມທຸກຍາກ, ປັງປຸງຊີວິດການເປັນຢູ່ຂອງປະຊາຊົນ; ວຽກງານດັ່ງກ່າວບໍ່ພຽງແຕ່ສົ່ງເສີມການຜະລິດສິນຄ້າຮັບໃຊ້ພາຍໃນ ໃຫ້ມີຄວາມເຂັ້ມແຂງ ແຕ່ຍັງເປັນການສົ່ງເສີມການຊົມໃຊ້ສິນຄ້າພາຍໃນຂອງລາວໃຫ້ກວ້າງຂວາງໃນທົ່ວສັງຄົມ ຊຶ່ງສອດຄ່ອງກັບການຈັດຕັ້ງປະຕິບັດຕາມ ມາດຕະການແກ້ໄຂບັນຫາເຄັ່ງຮ້ອນຂອງລັດຖະບານ ແລະ ທັງເປັນການປະກອບສ່ວນເຂົ້າໃນການເຕີບໂຕ ທາງດ້ານເສດຖະກິດ-ສັງຄົມແຫ່ງຊາດອີກດ້ວຍ.
ນອກຈາກນີ້, ທ່ານ ປະທານຍັງມີຄໍາຖາມເຈາະຈິ້ມຕໍ່ກອງປະຊຸມ ເພື່ອໃຫ້ຜູ້ເຂົ້າຮ່ວມໄດ້ແລກປ່ຽນຄໍາຄິດເຫັນຢ່າງກົງໄປກົງມາ ເພື່ອເຮັດໃຫ້ວຽກງານດັ່ງກ່າວບັນລຸຜົນສໍາເລັດຕາມຄາດໝາຍທີ່ວາງໄວ້.
